Zindagi kitni hai baqi?

Zindagi kitni hai baqi?
Maut se hii puchh lo

Maut ne phir kya kaha
Do girah aur kheench lo

Do girah kya hai batado
Ik jawanii ik budhapa

Jab jawanii paas aaye
Zindagi ko seench lo

Z'auf ka qissa puraana
Apni aankhein meench lo

Maut kii ab kya khabar hai?
Pagle! pehle jeena seekh lo.

Maati Ka

Jeevan sachcha sona
Maut hai gehna maati ka

Apni apni qismat
Ek gharaunda maati ka

Pyar khada chupchaap
Dil ka fasana maati ka

Baarish ki saughaat
Mera thikana maati ka

Khel raha bhagwaan
Aur khilauna maati ka

Beech sadak us raat
Pyaar bika tha maati ka

Ek adhoori pankti
Geet sunaye maati ka

Meri haqeeqat sun-lo
Ek bharam hai maati ka